Sige lang

Nai-release kamakailan ang unang album ng bandang Equilibrio na may pamagat na Sige Lang. Ito ay binubuo ng mga kanta ng pag-ibig at pag-asa, sa genre na pop rock.

Ang Sige Lang ay masasabing isang OFW album. Ang unang kanta, na may pamagat na Sige lang ako, ay tungkol sa pagtatrabaho at pamumuhay nang malayo sa pamilya. Ang mga sumunod na kanta ay hindi naman tuwirang tumatalakay sa buhay OFW ngunit maraming linya na kapuna-puna ang pangingibabaw ng damdaming OFW. Hindi ito dapat pagtakhan. 9 sa mga kanta ay sinulat sa Dubai at ang 1 ay sa Singapore. Ang huling kanta ay Harinawa. Dahil sa mga blessings at isang dasal na nakapaloob dito, pwede itong kantahin sa birthday, pasko o sa bagong taon. Pero higit sa lahat, bilang OFW, ito siguro ang gugustuhin mong kantahin sa pamilya mo o vice versa, kung tapos na ang bakasyon mo sa Pilipinas at pupunta ka na naman sa bansang pinagtatrabahuhan mo. Kung may genre na "OFW rock", ito na siguro iyon.

Narito ang video na naglalaman ng excerpts ng mga kanta sa album.



Ang iba pang impormasyon tungkol sa album ay makikita sa Facebook album page. Ang CD album ay available sa Amazon at CreateSpace at ang digital album ay sa Nimbitmusic.

Kumusta na?

Ang Kumusta Na (Makulit Ba?) ay isang kanta ng pag-ibig na sinulat ko. Medyo nag-eksperimento ako rito. Kanta ng pag-ibig pero walang salitang "iniibig" o "minamamahal". Walang "sinta" o "hirang" o "habibti".

Pagbibiro at pangungulit - ganon yung kanta.

Kumusta na? Wala pa ba?
Ako naman ay pwedeng maghintay pa.
Kaya nga lang, eh bakit pa
kung ngayon ikaw ay sigurado na?

Kung ‘di naman, saka na lang.
Ayaw ko ring ika’y minamadali.
Pero, teka, ngayon na lang
kung tayo’y doon din mauuwi.

Pwera na lang sa bandang gitna na medyo seryoso. Merong parang saglit ng zen (zen moment) . . .

Sandali'y hayaang maging sa ating dalawa.
Sa katahimikan ay may himlayang kay ganda.
Pakinggan mo ang puso ko.
Pakinggan mo ang sa 'yo.

Nangyayari iyan, di ba? Kasama mo yung chick. Biruan kayo nang biruan. Lokohan nang lokohan. Tapos biglang magiging seryoso. Tatahimik. Kasi, parang hindi na dapat magsalita. Siya rin, parang hindi na kailangang sumagot. Pakiramdaman na lang. Paparoon na, bok . . . Pero, dito sa kanta, balik na naman sa pangungulit.

Kumusta na? Wala pa ba?





Ako naman ay pwedeng maghintay pa . . .